علاقة الحالة النفسية بالأمراض الجلدية

الموضوع ابسط مما تتوقع

من الحاجات الي لاحظتها وانا بذاكر ان في كل مرة اعدي على مرض جلدي واشوف الاسباب الاقيه كاتبلي من ضمن الاسباب ( Psychological State )

فقولت لازم ادور واعرف العلاقة والموضوع طلع بسيط من حيث الفهم مش معقد نهائي. الحوار ينقسم لشقين ( عوامل داخلية وعوامل خارجية )

العوامل الداخلية - Internal Factors

في البداية كده لازم نفهم ان الجسم مش مجرد غطاء وخلاص لا ده بيتاثر بالحالة النفسية كمان ، لما تكون في حالة نفسية وحشة بيكون مصاحب ليها لضغط نفسي وتوتر والى اخره ، التوتر ده بيحفز الغده الكظرية انها تفرز

• الكورتيزول ( Cortisol )

• الأدرينالين ( Adrenaline )

• النورادرينالين ( Noradrenaline )

المواد دي مع استمرار افرازها بتضعف المناعة بشكل كبير وكمان بتزود مستوى الإلتهاب في الجسم والجلد احنا عارفين انه خط الدفاع الأول فاول حاجة هتتضرر الجلد لما تقابل اي فطريات او فيروسات وهكذا

فعندك مثلا الأمراض الفطرية زي ال (TINEA)

الجلد بطبيعته فيه خلاية مناعية لو في اي فطريات وصلت ليه تتعرف عليها وتمنع تكاثرها، واحنا بنتعرض لآلاف الحاجات من دي كل يوم

اما في حالتنا الي قولنا فيها ان المناعة ضعفت بسبب الحالة النفسية فالفطريات كده خلاص هتاخد راحتها وتتتكاثر في جلدك وتبدا تاكل مادة الكيراتين الي في جلدك وتنتشر وتعمل شكل البقع الدائرية زي كده :

العوامل الخارجية - External Factors

وده جانب غير مباشر شوية . يعني لما الواحد حالته النفسية بتكون مش افضل حاجة مبيهتمش بنفسه زي الأول من حيث ( النظافة - العناية بالبشرة - النوم - الأكل - شرب السوائل ) فبتكون عامل زي جيسي بينكمان كده بااظبط

كل ده ليه عامل كبير في ضعف المناعة كفاية وكمان ممكن يجيب امراض جلدية بشكل مباضر بسبب عدم النظافة فلازم نهتم بالجانب ده كمان .

فالدكتور الشاطر لما يجيله حد عنده مرض جلدي المفروض من ضمن التشخيص يساله عن حالته النفسية ميكتبلوش علاج يقلل الاعراض وخلاص ، لا المفروض يتابع مع دكتور نفسي جنب علاجه الدوائي طبيعي وده طبعا نادرا ما بنشوفه هنا بس ادينا اهو بنحاول ننشر الوعي .