كيف تكون مبدع في إدارة وقتك ؟

يومك راح يصير يومين

منغير مقدمات وقد ايه التنظيم مهم والا اخره كلنا عارفين ااكلام ده كله هقولك الحلول العملية علطول.

لازم في البداية تفهم انك انسان عندك عقل وده الي بيميزك عن الحيوانات يعني انت الي قادر تتحكم في نفسك مش نفسك الي تتحكم فيك ( اقرا الجملة دي كذا مرة )

• حدد وقتك بيضيع فين

معرفة المشكلة هي نص الحل انا عاوز دماغك بس تكون واعية للمشكلة أو وقتك كان بيضيع في ايه هيكون ليها عامل كبير عامة في تفاديها قدام.

• حدد هدفك

مينفعش تعيش منغير هدف لازم هدف في دماغك سواء انك تنجح في الترم ده او تحقق تارجعت معين في شغلك لازم يكون في هدف عشان ده الي هيدفعك تنظم وقتك ، منغير الهدف مش هتتحرك من مكانك اصلا.

• ترتيب الأولويات

اكتب كل حاجة انت عاوز تعملها في يومك زي To-Do-List كده بعدين الي ليه الأولية ده اول شئ تعمله في يومك عشان لو اي حاجة حصلت في يومك تكون على الأقل محقق التارجت بتاع اليوم ده

دي هنقسمها ل 4 اجزاء

1. مهم وعاجل( هدفك الأساسي )

2. مهم وغير عاجل ( مهارة ثانوية )

3. غير مهم وعاجل ( خروجة مع صحابك مثلا )

4. غير مهم وغير عاجل ( سكرول على السوشيال ميديا )

بعد ما حددناهم هنوظفهم بقا على مدار يومنا ونشوف هنحط ايه ونشيل ايه

• الزم نفسك بوقت وتحدى نفسك

استخدم مدة زمنية مش وقت ، طب يعني ايه ؟

قسم اهدافك بين الصلوات ، سواء انت مسلم او مسيحي مش هتفرق عادي على فكرة

1. بين الفجر والظهر

2. بين الظهر والعصر

3. بين العصر والمغرب

4. بين المغرب والعشاء

5. بين العشاء و الساعة 11

على سبيل المثال كنت بقسم اهم حاجة عندي في وقت بين الفجر والظهر والأقل شوي بين الظهر والعصر والأقل بين العصر والمغرب وهكذا ، لإن بكل بساطة لو قولت هحدد ساعتين مثلا ممكن تيجي الصلاة في النص وتقطع الوقت فأنت تحددها بين الصلوات بنسبة كبيرة مش هيكون في وقت ضايع وكمان ميزة تانية

انك بني ادم مش اله ( محتاج فواصل ترتاح فيهم ) فالوقت بين الأذان والإقامة والصلاة دول كافيين يفصلوا دماغك ويعيدوا شحنهم عشان تكمل تاني بكفاءة وكمان تقدر ترد على الرسايل وهكذا

وطبعا مش محتاج اقولك اذا خلصت كل الحاجات المهمة مارس باقي هواياتك براحتك.

• خطط قبل ما تنام

عشان كده قولتلك فوق من العشاء ل 11 مش 12 هيكون عندك الساعة دي تخطط هتعمل ايه في اليوم الي بعده براحتك

متصحاش وتخطط هتعمل ايه في اليوم بالطريقة دي اقل حاجة ربع اليوم هيضيع

انت من قبل ما تنام تكون محددد هتعمل ايه عشان لما اصحى يكون عندك الإرادة والحماس انك تقوم وكمان زي ما قولتلك عشان متضيعش وقتك.

وزي ما قولتلك فوق ان انسان مش حيوان يعني تكمل الي هتعمله باكمل وجه وتتحكم في نفسك وتبعد عنك المشتتات عشان تنجز فعلا في الفترة الزمنية الي حددتها لنفسك وممكن تجرب طريقة ال ( Pomodoro ) او على حسب انت بترتاح ازاي.

اقدر اوعدك اذا طبقت كل الي قولتهولك فوق هتلاقي تغير بشكل مهول في يومك وانتاجيتك

اتمنى تكون استفدت