في اخر فترة قابلت ناس كتير سواء في الحقيقة أو سوشيال تقولك ان تطوير الذات ده وهم وملوش اي لازمه نهائيا وكلام كتير من ده وانا متفهمهم جدا بصراحة
بس تعالى اقولك مثال ونحلله مع بعض
ولنفترض ان في شخص بدائي جدا من بتوع الكهف دول هو في غرفة فاضية، لما هو بيكون عاوز يقعد بيقعد على الأرض الخشنة الي في الأوضة، جينا مرة واحده حطينا في الأوضة دي كرسي، هو في البداية مش هيكون عارف ايه ده وهيفضل يجرب فيه ويجرب ويجرب ومرة واحده تظبط معاه ويقعد عليه ووالمرادي هيقعد مرتاح لأول مرة بعد محاولات كتير من فهم الشئ ده ( هو كان بيقعد فعلا بس كان في صعوبات بس لما عرف يستخدم الكرسي بقا بيقعد وهو مرتاح ) بس لمجرد وجود الكرسي هل كان قادر يكون مستريح ؟ ولا بقا مستريح بعد العديد من المحاولات لحد ما عرف يقعد ؟
طب ايه علاقة ده بالي بنقوله ؟
تطوير الذات بيكون عبارة عن أفكار والعقل بتاعنا بيكون فاضي بيتصرف في أموره بصعوبة (بس هو بيتصرف). فلما نحط في دماغنا فكرة تساعد ونحاول نطبقها ونجربها مرة واتنين وتلاته بتلاقي أن الفكرة دي ساعدتنا نتصرف في أمور كنا بنعديها بصعوبة بقت سهلة وهي دي فكرة تطوير الذات بيديك طرق وافكار تخليك بتعدي حياتك بسهولة سواء في طريقة تفكير او حاجة تطبقها في حياتك فوجود الفكرة لوحدها مش كافي انه يساعدك في حياتك ده محتاج تطبيق وجهاد وتعب منك ( اهم نقطة تفهمها انه مش علاج سحري من اول ما تقرأ فيها تلاقي حياتك اتحلت. لا، ده محتاج تبني الفكرة وتكرارها على دماغك وتحاول تطبقها اكتر من مرة عشان عقلك يكون اتستتم عليها ( اي حاجة بتيجي بسرعة بتروح بسرعة ) فلازم تفهم ان الموضوع بيكون صعب وبياخد وقت على ما تتقن او تتبنى الفكرة وده طبيعي جدا، كون انك رافض فكرة انك تكتسب حاجة بصعوبة وعاوز كل حاجة سهلة وسريعة فنصيحة بجد الحق نفسك وغير من مفهومك ده عشان مفيش حاجة في الحياة بالشكل ده ( اسف على الصراحة المبالغة بس دي الحقيقة )
هضربلك مثال على نفسي
زمان من حوالي 10 سنين كده يعتبر مكانش عندي ثقة في النفس نهائيا وبتهته في الكلام وحاله مذرية فقررت اقرا عن الثقة في النفس واسمع فيديوهات والى اخره ومن الحاجات الي قريتها (انك متهمتش لأي رأي أو حكم عليك في الاول والاخر ده نابع من انسان زيه زيك يعني فخليك على طبيعتك واعمل الي انت عاوزة ) هل لمجرد اني قريت ده كده انا بقيت واثق في نفسي ؟ اكيد لا، ده يعتبر الأساس ( الكرسي ) الي هبدا أطبق واجرب عليه، فالي عملته :
بقيت بتكلم مع أي حد أقابله وافتح مواضيع سواء مع سواق التاكسي أو أي حد أقابله في الشارع أو في أي مكان وفي أي برزنتيشن أو تقديم ببادر اني اكون انا الي اقدم حتى لو مش هعرف اتكلم برده هطلع وبدأت اعمل فيديوهات وأنزلها على السوشيال ميديا وكله يبشوفها وبدات اتقبل التريقة والنقد بصدر رحب واكيد في البداية كنت بتضايق بس مع الوقت مبقاش فارق خالص ومرة مع مرة لقيت نفسي أتقنت الموضوع ده وبقا عندي ثقة بالنفس وده جه ازاي ؟؟
مع فكرة وتطبيق عليها مش فكرة بس والتطبيق اخد وقت لحد ما اتقنته مجاش بسرعة وده فعلا الي هيفيدك في حياتك
شق اخر
وانا لا أنكر وجود حلول سريعة في تطوير الذات بس دي بنعتبرها زي Lifhacks من أمثلتها زي ما كتبت في مقال ( كيف تكون مبدع في إدارة وقتك ؟ ) انك مثلا بدل ما كل يوم تصحى الصبح تخطط هتعمل ايه في يومك انت خطط هتعمل ايه في اليوم الي قبلها قبل ما تنام كده هتوفر وقت كبير اول في اليوم ده وتقدر تستغله في أمورك التانية ودي من تطوير الذات برده ( الإنتاجية ) ومش محتاجه تدريب أو تطبيق وكمان فعاله وهكذا في أمور كتير يعني
نقطة مهمة
مش معنى انك بتكره صناع المحتوى الي بيعملوا محتوى عن تطوير الذات فتكره تطوير الذات بذات نفسه ، ده اسمه ( Association Bias ) ومش صح انك تعمله ففرق ومتخليش انحيازاتك تضللك
وبس كده اتمنى تكون فهمت الفكرة ولقيت اجابة لسؤالك
"ممكن تشرح "هل العقل أقوى من العاطفه؟
صح حتى انا ساعدتني كتب تنميه الذات صراحه واستحي اقول لانه ياخذوك مصخره انها اسخف الكتب ومامنها فايده مع انهم يقريوا روايات اتفه