عمرك لاحظت ان في ناس كبيرة في السن بس ظاهريا تحسهم في الثلاثينات من عمرهم ؟ وناس تانية يكونوا لسه مدخلوش على الخمسينات بس تشوفهم تقول عليهم في السبعينات وشكلهم كبير اوي؟
مثلا زي دول بالظبط ( الاتنين في الخمسينات من عمرهم )
الأسباب ( Free Radicals Theory - نظرية الجذور الحرة )
في اسباب ونظريات كتير بس انهاردة هنتطرق لعامل من اهم العوامل في تطور الشيخوخة الا وهو نظرية الجذور الحرة : بتكون عبارة عن جزيئات نشطة غير مستقرة ( فاقده الكترون ) بتهاجم الخلايا الي حواليها باستمرار وبتعمل تلف في الحمض النووي والبروتينات والدهون الي في أغشية الخلايا ومع الوقت واستمرار العادات الي بتزود الجذور الحرة بتتراكم في الجسم بشكل كبير وضررها يزيد اكتر وتضعف من وظائف الخلايا والأنسجة ومن هنا بتبدا الشيخوخة ( وبالمناسبة بتساهم بشكل كبير في الإصابة بالكانسر ) وبتحصل بسبب عوامل كتير زي
السمنة
التدخين
الأكل المعمول في زيوت مهدرجة أو محروق أو مصنع
السكريات
التعرض المفرط للشمس ( فترة بعد الظهر للعصر )
قلة النوم
التوتر النفسي المزمن
التعرض لدخان المصانع والسيارات
التعرض للإشعاعات
طيب ايه الحل ؟
نظام غذائي خالي من الي ذكرناه فوق او نقلله جدا
اكل غني بمضادات الاكسده ( لإنها بتعادل عمل الجذور الحرة بإعطاء الكترون ومنع ضررها ) مثل
- مكسرات
- الخضراوات والفواكه ( الاهم )
- دارك شوكليت
- الشاي الاخضر
- القهوة ( بإعتدال )
- الكركم والقرفة
- زيت الزيتون
ممارسة رياضة ( بالذات الجري 3-4 مرات اسبوعيا ) لأنها بتحسن جسمك ككل وبتقلل من أمراض القلب والرئتين والسكر والضغط ويتحسن من كفاءة عقلك وكثافة عظامك وشكل جسمك ككل وده طبعا هيكون ليه عامل كبير في تاخير شيخوختك وحمايتك من الأمراض
نوم من 7-9 ساعات
امتناع عن تدخين أو الجلوس بجانب مدخن
لو هتتعرض لشمس لمدة طويلة استخدم واق شمس
الحفاظ على وزنك ( مهم )
( بالنسبة للاكل ممكن تعطي نفسك وجبة فري سواء مقليات او سكريات وهكذا بس على فترات متباعدة وتكون مرة واحده بكميات معتدلة مثلا كانها مكافاة على التزامك )
وخليك فاكر صحة خمسيناتك وستيناتك تبدا من التزام عشريناتك
الخاتمة
ممكن تحس ان العادات دي صعبة او تقول لنفسك يارجال خلنا نعيش على راحتنا بس
بس بجد لما توصل سن ال50 او ال60 وتلاقي الامراض بتاكل في جسمك وانك مش عارف تعيش حياتك طبيعي وتكون عاله على غيرك هنا بجد هتقول ياريتني كنت التزمت ياريت الزمن يرجع بيا تاني عشان انظم حياتي وانظم عاداتي بس للاسف مش هتقدر …
اعتبر ان ده حصلك وانك دلوقتي قدرت ترجع بالزمن وقادر تغير عاداتك عشان قدام تعيش حياة صحية، الفرصة معاك اغتنمها ….
افضل شي في مقالاتك انك بتكتب باللهجة المصرية بحس اللهجة بتميزها
مقالاتك كلش حلوه منين تجيب الافكار؟