طبعا انت دلوقتي بتقول لنفسك ليه يعني هي اهم مهارة؟ بكل بساطة يصحبي لإن المهارة دي هي حجر اساس تعلم كل مهارات حياتك، هتخليك قادر تبدا وتستمر في اي مهارة او عادة حتى لو مش قادر ومنغيرها معتقدش هتقدر تكمل تعلم او تكمل في اي شئ انت عاوز تعلمه في حياتك. فمنغير تضيع وقتك كتير يلا بينا نبدأ
لا تجعل نفسك المتحكمة فيك
في منطقة في الدماغ اسمها القشرة الأمامية الوسطى .. المنطقة دي مرتبطة بالإرادة والإصرار، المنطقة دي بتكبر عند الشخص لما بيجبر نفسه انه يعمل افعال نفسه مش حاباها ( لإن بطبيعة النفس البشرية بتحب الراحة والخمول ) فانت هنا بتركن نفسك على جنب وانت الي بتبدا تكون المتحكم وتعمل المهام الي نفسك بتكرهها ( بس هي مفيدة ليك طبعا ) زي الرياضة والقراءة وترك السكرول عديم الفائدة، فكده هتلاقي ارادتك واستمراريتك بتتحسن لوحدها لمجرد انك بقيت شجاع وتحكمت في نفسك .. وفكر نفسك دايما بالسؤال ده ( هل انت ضعيف لجعل نفسك المتحكمة فيك ؟ )
حتى امير المؤمنين سيدنا عمر بن الخطاب لما لقى ابنه كل ما نفسه تحسه على اللحم بيروح يشتري فوقفه وقاله ( أوكلما اشتهيت اشتريت ؟ ) ودي دعوة واضحة لضبط النفس
كن جرئ
كتير مننا بيكون عنده مواقف متطلبه كسر حاجز كبير بينك وبين نفسك عشان تعملها زي مثلا انك تقدم لأول مرة في مقابلة عمل او تطلع تتكلم قدام جمهور كبير ( بالمناسبة كتبنا عنها مقال قصير لكي تحترف الموضوع ) او تطلع لأول مرة تنشئ محتوى وتصور نفسك وانت بتتكلم وبتقول رأيك .. كل ده بيكون مخيف جدا جدا جدا في البداية وهنا الفكرة انك تنغمس رغم خوفك وتكسر الراحة الوهمية بتاعت نفسك لإن المنطقة الأمنة دي عمرها ما هتوصلك لشئ .. طيب يجاسر انا ممكن افشل واتكسف، طب .. وايه يعني ؟ لازم تفهم حاجة مهمة، ان منغير فشل وتعثرات انت مش هتتقدم وتوصل لشئ ودي حاجة اسمها دائرة التعلم ( اتكلمنا عنها في النقطة التانية من المقال ده ) ، مفيش شخص على وجه الكوكب ده كله نجح الا وفشل كتير .. فانت رحب بالفشل ومتعتبروش النهاية بل هو الوسيلة الي هتخليك تطور وتحسن منك قدام فاترك المنطقة الأمنة وخاطر لكي تحصل على صلابة ذهنية حديدية ( بغض النظر عن النقطة دي بس كمان من مميزات انك تكسر المنطقة الأمنة وتنغمس هي ان هتلاقي فرص كتير بتتفتحلك مكنتش تتخيل تجيلك لولا توفيق ربنا اولا طبعا وثانيا الجراءة والإقبال )
تجنب الدوبامين السريع والتزم بنمط حياة صحي
من اكتر الأسباب الي مش بتخلينا نكمل في اي شئ بنعمله هي ان بكل بساطة مفيش شئ مهم وذو قيمة الا ووصوله بيحتاج وقت كبير وتعب وده الطبيعي الي لازم نتقبله وهنا المشكلة ان احنا اتعودنا على الدوبامين السريع علطول بسبب الريلز والسكرول الي بيقعد بالساعات .. وانا هنا مش بقول تمنعه خالص مرة واحده علطول لا، اي عادة سيئة عشان تبطلها من وجهة نظري لازم تبطلها بالتدريج ( وده اتكلمنا عنه في مقال فلسفة السلم بالتفصيل )
اربط الفعل بالنتائج بعيدة المدى
لما تفكر في النتائج او الهدف الاخير لفعل الشئ الي انت بتعمله بيكون كفيل يغيرلك نفسيتك وانت بتعمله ،يعني مثلا بدل ما اقول انا لازم امارس رياضة انهارده لا، قول انا هروح اعمل الشئ الي هيحميني قدام من امراض القلب والسكر وهيخليني اعيش بشكل احسن قدام وهكذا على اي شئ انت بتعمله وبسبب الموضوع ده هيكون عندك سبب حقيقي انك تعمله ومتقفش
كما تتخيل النجاح .. تخيل الفشل
زي ما قولتلك فوق على تخيل الهدف الأخير وكده.. طب يجاسر مش نافع معايا، حلو يبقا مع تخيل الهدف تضيف التفكير انك لو معملتش الفعل ده او لو مستمرتش عليه فهتقابل الحياة او نمط الحياة الي انت مش عاوزها نهائي وخايف منها يعني مثلا في الرياضة مع تخيل الهدف تتخيل انك لو معملتش كده هتعيش حياتك كلها عاله على غيرك ومش قادر تتحرك وتعيش حياتك والأدوية الكتير ماثرة على كبدك وكليتك وهكذا .. فبالشكل ده عن تجربة صعب تتخازل او تتقاسع ادام الوجهين قدامك بالذات الوجه الي بيخوفك
تبنى الهويتك
من الحاجات الي فرقت معايا بشكل كبير هي ان ربط الي عاوز اعمله بهوية يعني بدل ما اقول انا همارس الرياضة بس بقول انا همارس الرياضة لأني شخص رياضي .. دي صفتي، دي هويتي فانا هفقد هويتي لو تكاسلت عن اداء الشئ الي مديني الهوية وطبعا ده شئ مش لطيف لحد فينا ان صفاته او هويته تتزحزح ( ممكن تحسه مجرد كلام وهبل بس كنت بقول زيك بالظبط ولما جربت لقيت تغير كبير )
واجه نفسك بالحقيقة
اياك تكذب وتضحك على نفسك يعني مثلا بدل ما تقول لنفسك انا مذاكرتش انهارده بسبب ان اليوم كان صعب قول انا الي تكاسلت وانا الي مععرفتش انظم يومي.. بدل ما تقول مروحتش مقابلة العمل بسبب ان العدد كتير قول انا الي كنت جبان وخايف من الرفض .. لما تكون صريح مع نفسك دايما هتلاقي نفسك بدل ما كنت بتهرب من الفعل هتهرب من جلد الذات وصراحتك بفعل الشئ، لان الصراحة مع النفس بتكون صعبة شوية على الواحد
حط لنفسك حد ادنى
يعني انت لازم تكون عامل حسابك لأي ظرف ممكن يحصل في يومك (غصبن عنك) بحيث ان اليوم يعدي وانت على الأقل عملت الشئ الي انت عاوزة حتى لو بنسبة اقل، يعني مثلا التمرين بتاعك بيكون في رينج 60 دقيقة، لو حصل اي شئ وخرب اليوم تكون مجهز اني هلعب مثلا ربع التمرين بس يعني من 10-15 دقيقة بحيث ان اليوم ميكونش عدى منغير استفادة
To-do-list
لازم قبل ما تبدا اليوم تكون مجهز كل الأشياء الي ناوي تعملها ويكون جنبها خانة تكتب فيها علامة صح انك انجزتها، وتكون حاطط في بالك ان اليوم مش هيعدي الا لما اخلص المهام دي بأي شكل واصلا شكلها لوحده بيكون كفاية يخليك تقبل على انجاز المهام ( بس لازم انوه خليك شخص عاقل وانت بتحط مهامك يعني حط في بالك انك انسان مش سوبرمان فخليك عقلاني وحط اهداف تتماشى مع شخصيتك ومع يومك ) واعمل حسابك لكل مهمة ان يكون ليها حد ادنى تحسبا لأي ظرف زي ما قولنا في النقطة الي فوق بس في ااطبيعي انت بتعملها بالكم المطلوب
نقطة هامة #1
لازم تكون عارف ان النقاط دي تنفيذها في البداية بيكون صعب ومش مريح والمشكلة ان… ده الطبيعي مفيش حاجة هتفيدك في حياتك فعلا الا ووصولها صعب ومحتاج وقت ومجهود منك فلازم تتقبل ده ومتحطش في بالك انك من اول مرة هتحترفها لا، محتاجه وقت واهم شي شجاعتك واستمراريتك .. لو انت مش شجاع كفاية مش هتظبط معاك .. لازم تكون شجاع قوي قادر على التحكم ومواجهة نفسك، فتوكل على الله وتحلى بالشجاعة وان شاء الله هتكون شخص مختلف تماما عما كنت فيه وهتوصل للي انت تريده
نقطة هامة #2
مش معنى انك تكون منضبط وكده فتيجي على نفسك لدرجة انك تيجي على صحتك واعصابك لا، زي ما قولتلك انك تحط اهداف تتماشى معك ومع وقت يومك يعني تكون مناسبة مش مبالغ فيها فتكون منضبط بعقلانية مش بهمجية
الخلاصة
كن شجاع وتحكم في نفسك ولا تجعلها المتحكمة فيك
كن جرئ وبادر في اي فرصة تاتي لك ولا تهتم لأحد
تجنب الدوبامين السريع وتقبل بطئ الوصول
اربط الأفعال بالنتيجة النهائية سواء كانت مفرحة اذا فعلتها ام مخزية ان لم تفعل
اربط نفسك بهوية الشئ لا الشئ
كن شجاع وصريح مع نفسك
سجل مهامك وضع لها حد ادنى كخطة بديلة
كن منضبط لكن ايضا رحيم على نفسك
كل الكلام ده مستخلص من كتاب
Can’t Hurt me by David Goggins
لكن مع تعديلات مني بحيث تتماشى مع حياتك اكثر بحيث تكون ادمية وعقلانية لا همجية
تحفهههه🌟
ابدعت