Dunning Kruger Effect - وهم المعرفة

عمرك لاحظت ان الناس الي عندهم خبرة وعلم هتلاقيهم عقلانيين في تقدير نفسهم ، اما الي عندهم معلومات سطحية ولسه يدوبك بادئين هتلاقيهم مبالغين في تقدير نفسهم وممكن يوصل معاهم لدرجة الغرور

وده الي بنسميه ال Dunning Kruger Effect

متتخضش من شكل المخطط الي قدامك هنشرحه جزء جزء بالتفصيل

اول مرحلة : الثقة المفرطة

لما الواحد بيكون جديد على موضوع ويبدأ يسمع معلومتين من هنا على فيديوهين من هنا بيبدا عقله يخدعه ويقوله انت بقت ملم بالموضوع انت اسطوري انت وانت وانت وثقته توصل للسماء ويبدأ يتغر بالمعلومات الي معاه وشايف نفسه اعلم من الي حواليه والمرحلة دي هي الأخطر وبتكون عامل كده بااظبط

ثاني مرحلة : منحنى الإحباط

هنا بقا بتبدا تفهم أن الموضوع كبير وكبير اوي كمان وان معلوماتك لاشئ قدام بحر العلم ده وفي ناس كتير اوي أعلى منك فتبدأ تدخل في زون الإحباط دي وبتكون عامل زي رسمة فان غوخ كده بالظبط والمرحلة دي عامة بداية مبشرة انك طلعت من الجهل للعلم

ثالث مرحلة : السعي للتعلم

هنا بقا بتبدا تاخد خطوة أن لازم اتعلم لازم اعرف اكتر ويكون الحوار ده باانسبالك ممتع اكتر مهو ممل وده الي بيخليك تسعى بجد

رابع مرحلة : الخبرة

ولما اقول الخبرة مش معناها انه خلاص وصل لا بل عرف ازاي يقيم نفسه ويقيم علمه كويس وعارف امتى انا خطأ وامتى صح ويعتبر بقا مستقر نفسيا اكتر ووصل للنضج الحقيقي

تاثير السوشيال ميديا

السوشيال ميديا ليها تأثير كبير في انغماس الناس في أول مرحلة فقط وهي الثقة المفرطة لانها بتديك معلومات كتير في وقت قصير وتحسسك انك لميت الموضوع كله وكمان بتلاقي اكتر ناس عندهم ريتش هما الي بيتكلموا بغرور حتى لو معلوماتهم غلط زي ما شفنا في ضياء العوضي فبيبدا يقتنع ان الغرور هي العلم وهي الطريق الصح وده طبعا غلط زي ما شفنا وفهمنا فوق

كونك بقا عندك علم بالتأثير ده في حد ذاته بيمنعك انك تقع فيه فمش محتاج اقولك حلول أو ازاي تتجنبه وخليك فاكر طول منت شايف الموضوع معقد وصعب وانك عارف قليل فانت كده ماشي في الطريق الصح